Sgeama Greis Gnìomhachais nan Oileanach (360G-BNG-2324_3033)

’S e pròiseact Sgeama Greis Gnìomhachais Gàidhlig a tha seo, far am bi oileanaich le sgilean Gàidhlig aig diofar ìrean a’ faighinn cothrom cosnaidh le buidheann Gàidhlig thairis air 10 seachdainean den t-samhradh eadar Ògmhios agus Lùnastal aig ìre Tuarastal Bith-beò Dhà-rìribh, (Real Living Wage 2023: £10.90 gach uair). Bidh iad ag obair 30 uairean a thìde gach seachdain ann an dreuchdan làn-ùine le buidhnean far a bheil a’ Ghàidhlig na cànan obraich làitheil, a' gabhail a-steach, m.e. buidhnean ag obair sna h-ealain, ann am foghlam, buidhnean leasachaidh, comainn eachdraidh agus na meadhanan Gàidhlig.  Tha seo an dà chuid a’ neartachadh nan sgilean cànain aca, agus a’ leudachadh an comasan san àite-obraich.  Tha buidhnean is oileanaich air a bhith a’ moladh an Sgeama a thaobh èifeachdas gach bliadhna bhon a thòisich a’ Chomhairle an Sgeama a ruith ann an 2015, le eadar 10-15 buidhnean agus oileanaich a’ sealltainn ùidh san Sgeama mar as àbhaist gach bliadhna.  Chan fheumar a bhith fileanta sa Ghàidhlig, ach feumaidh co-dhiù beagan sgilean labhairt, sgrìobhaidh agus leughaidh Gàidhlig a bhith aig na h-oileanaich. Mar sin, tha an Sgeama fosgailte do dh’oileanaich le diofar ìrean de sgilean sa chànan. Feumaidh iad cuideachd a bhith a’ leantainn cùrsa oilthighe/colaiste, ge-tà, (le dùil gum bi iad a’ dol air ais a dh’ oilthigh/colaiste as t-foghar), agus feumaidh iad a bhith a’ fuireach anns na h-Eileanan an Iar rè an t-samhraidh. Bìthear a’ pàigheadh 50% de chosgaisean nam buidhnean fon Sgeama airson tuarastal nan oileanach, agus bidh na buidhnean fhèin a tha san Sgeama a’ pàigheadh an 50% eile.