Seiminear Fiosrachaidh mu Mhòr-ionadan Gàidhlig (360G-BNG-CC-2024-01382)

Tha sinn airson seiminear fiosrachaidh a chur air dòigh a shealltainn don choimhearsnachd Ghàidhlig ann an Dùn Èideann sealladh fhaighinn air mar a tha mòr-ionadan Gàidhlig/Gaeilge ag obair ann an àiteachan eile. Chluinneamaid bho riochdairean ionad Gaeilge ann an Èirinn a Tuath (Aonach Mhacha, tha sinn an dòchas), Cultarlann Inbhir Nis agus An Lòchran ann an Glaschu. Chuidicheadh an tachartas sinn ann a bhith a' brosnachadh buill de choimhearsnachd Ghàidhlig Dhùn Èideann a bhith a' smaoineachadh gu fiosrach agus gu tuigseach mu na cothroman a th' againn mòr-ionad a stèidheachadh ann an Dùn Èideann, agus cuideachd mu na diofar dhùbhlan a bhiodh romhainn. Bhiodh an tachartas feumail cuideachd ann a bhith a' brosnachadh dhaoine gus pàirt a ghabhail anns an t-suirbhidh coimhearsnachd a tha sinn an dùil sgaoileadh anns an Ògmhios 2024 air prìomhachasan dhan ionad a tha fa-near dhuinn ann an Dùn Èideann. 'S e tachartas aon fheasgair a tha fa-near dhuinn, mu 3 uairean a thìde, agus tha sinn an dòchas gun tig mu 25-40 daoine ga fhrithealadh. Tha e follaiseach gu bheil Èirinn (agus gu h-àraidh Èirinn a Tuath) fada air thoiseach air Alba ann a bhith a' stèidheachadh mhòr-ionadan agus gu bheil tòrr ri ionnsachadh bhon fheadhainn a tha an sàs anns na cultarlannan thall. Bhiodh tabhartas bho sgeama Colmcille gu math iomchaidh airson iomlaid fiosrachaidh is eòlais mun obair leasachaidh seo a chur an gnìomh. Thèid na prìomh thaisbeanaidhean bho riochdairean nan diofar aonadan a thoirt seachad anns a' Ghaeilge/Ghàidhlig gu ìre mhòr mhòr, agus tha sinn an dùil gum bi a' mhòr-chuid den deasbad nan cois anns a' Ghàidhlig (agus gu ìre a' Ghaeilge) cuideachd.