Leasachadh na Gàidhlig ann am Meadhan Earra-Ghàidheal (360G-BNG-TFC-2026-02412)

Tha an tagradh seo airson maoineachadh fhaotainn gus sreath den leasanan Gàidhlig a lìbhrigeadh do luchd-ionnsachaidh agus gus cearcall-còmhraidh a chumail do luchd-labhairt na Gàidhlig aig a bheil ìre eadar-mheadhanach agus air adhart ann am Meadhan Earra-Ghàidheal. A rèir an rannsachaidh a chaidh a dhèanamh o chionn ghoirid, tha an t-uabhas dhaoine ann am meadhan Earra-Ghàidheal ag iarraidh leasanan aghaidh ri aghaidh ag amas air luchd-tòiseachaidh. Agus a bharrachd air sin, tha goireas a dhìth air a’ choimhearsnachd do luchd-ionnsachaidh no luchd-labhairt aig a bheil tuigse air a’ chànan no comas air còmhradh a chumail airson Gàidhlig a bhruidhinn is a chleachdadh aig an ìre freagarrach dhaibh gus adhartas a dhèanamh. Tron chearcall-còmhraidh seo, bidh mi ag amas air brosnachadh agus misneachd a thoirt do na daoine a bhios an làthair le geamannan, gnìomhan agus taic a thaobh puingean cànain.’S mar sin, le taic is aonta bhon bhuidheann ionadail aithnichte de luchd-ionnsachaidh na Gàidhlig, an canar ris Companaich Dhail Riada, tha mi a’ cur a-steach airson taic-airgid mar neach fa leth gus am feum agus an t-iarrtas seo a choileanadh. Ma shoirbhicheas leis an tagradh seo agus an iomairt seo a thèid a thoirt seachad leam fhìn, beachdaichidh Companaich Dhail Riada air tagradh a chur a-steach mun àm seo an-ath-bhliadhna gus togail air an adhartas a thèid a dhèanamh mar thoradh air an t-sreath de chlasaichean agus cearcall-còmhraidh a lìbhrigeas mi don choimhearsnachd. A thaobh structar nan clasaichean do luchd-tòiseachaidh, tha dùil agam ris na goireasan SpeakGaelic A1 ùisneachadh gus dèanamh cinnteach gun tèid adhartas a dhèanamh am measg nan oileanach. Agus a bharrachd air sin, cuiridh mi ris na clasaichean leis na stuthan ionnsachaidh eile agam agus bheir mi an cothrom dhaibh eòlas a chur air dualchainnt na sgìre. Thathar an dòchas gum bi an iomairt seo na bhuannachd do dhaoine de gach seòrsa air feadh na sgìre a chionn ’s gun toir e cothrom air leth is ruigsinneach do mhuinntir na sgìre gus Gàidhlig ionnsachadh nach eil ri fhaighinn san sgìre seo an ceartair agus nach eil air a bhith ri fhaighinn o chionn fhada.